Խորհուրդներ ընտանեկան բյուջեի կազմակերպման համար
Դուք քիչ թե շատ վաստակում եք, բայց և այնպես չե՞ք կարողանում հասկանալ, թե ինչի վրա են ծախսվում ձեր փողերը: Զարմանում եք, թե ինչու մինչև հաջորդ աշխատավարձի օրը չեք կարողանում ծայրը ծայրին հասցնե՞լ: Հավատացե՛ք, այդ խնդիրն ունեք ոչ միայն դուք. ֆինանսները խելամիտ և կազմակերպված տնօրինելու հարցում դժվարանում են բազմաթիվ մարդիկ թե՛ ամուրի, թե՛ ամուսնացած:  Մեր ծնողները, սովորաբար, մեզ չեն սովորեցնում խելամիտ պլանավորել ընտանեկան բյուջեն: Նրանք սեփական փորձի ճանապարհով են հասել այդ «գիտությանը» և մոռացել են, թե ինչքան դժվարությունների են հանդիպել ինքնուրույն կյանքի առաջին տարիներին: Այնուամենայնիվ, երբեք էլ ուշ չէ սովորել, թե ինչպես կարելի է գումարները ծախսել խելամիտ կերպով: Ընտանեկան բյուջեն անհրաժեշտ է տնօրինել կազմակերպված, եթե անգամ ձեր ընտանիքը միայն դուք եք: Համակարգե՛ք բոլոր ծախսերը Առաջին քայլը բոլոր ծախսերը համակարգելու մասին վճռական որոշում կայացնելն է: Դուք, ամենայն հավանականությամբ, ստիպված կլինեք հրաժարվել ձեր որոշ հաճելի սովորույթներից` կենտրոնանալով ավելի կարևոր ծախսերի վրա: Շատ հաճախ խանութում հանդիպելով որևէ հաճելի մանրուքի` մենք չենք կարողանում հրաժարվել այն գնելու գայթակղությունից: Գնման պահին մեզ թվում է, թե այդ իրը շատ էժան է և անհրաժեշտ, բայց եթե մի փոքր կենտրոնանանք ու հիշենք, թե ինչքան նմանատիպ մանրուքներ ենք գնել վերջին շրջանում, ապա տհաճորեն կզարմանանք, միգուցե նաև հիասթափվենք: Բոլոր ծախսերն անխտիր պետք է գրանցել Եթե համակարգիչ ունեք, շատ հարմար կլինի ծախսերի ու եկամուտների հաշվառումը իրականացնել դրա օգնությամբ, իսկ եթե ոչ՝ կարելի է նաև ուղղակի գրի առնել թղթի վրա: Օրվա մեջ որոշակի ժամանա’կ տրամադրեք և լրացրե՛ք հաշվառման աղյուսակը` նշելով կոնկրետ ինչի վրա եք ծախսել ձեր գումարը: Ձեր ցուցակում անպայման նշե’ք մի քանի կարևոր կետեր. օրինակ` «կոմունալ ծախսեր», «Կենցաղային ծախսեր», «Կրթություն», «Տրանսպորտ», «Հեռախոս», «Ինտերնետ», «Սնունդ» և այլն: Միգուցե սա տաղտկալի է ու, ըստ ոմանց, հանգեցնում է ժլատության, բայց այդ «զոհողությանը» անպայման պետք է գնալ: Բանն այն է, որ ուսումնասիրելով ձեր մի քանի ամիսների գրառումները, դուք կորոշակիացնեք, թե ինչքան գումար եք ծախսել անհրաժեշտ իրեր գնելու համար և որքան եք վատնել պարզապես հաճույքի համար: Պարտադիր ծախսերը որոշակիացնելուց հետո կարելի է անցնել մեկանգամյա գնումներին: Եթե մոտ ժամանակներս պատրաստվում եք թանկարժեք գնում կատարել, ապա այդ նպատակով որոշակի գումար մի կո’ղմ դրեք և պարտադի’ր կատարեք ձեր ամենօրյա ներդրումը: Որոշակիացրե’ք, թե տվյալ ամիս տան համար անհրաժեշտ իրերից, հանդերձանքի պարագաներից ի՞նչն է պետք առաջնահերթ ձեռք բերել: Գրանցե՛ք այդ ամենը ցուցակում: Հիշե՛ք` կա՞ն ընկերներ, բարեկամներ ու մտերիմներ, ովքեր իրենց ծննդյան օրը կամ մեկ այլ ուրախ առիթ նշելու են այդ ամիս: Մոտավորապես որոշեք` ինչքա՞ն գումար եք ուզում տրամադրել այդ նվերների համար, ցուցակում ավելացրե՛ք նաև այդ կետը և դրա համար նախատեսված գումարը նույնպես մի կո’ղմ դրեք: Գումար հաճույքների համար Պարտադիր ծախսերը կազմելուց և գրառելուց հետո մնացած գումարը կարող եք բաժանել ամսվա օրերի թվին. լավ մտապահեք գումարի չափը, քանի որ տվյալ օրը գերածախսելով գումարի որոշված սահմաչափը` ինքնըստինքյան պետք է կրճատեք մյուս օրվա ծախսը: Հիշե՛ք այդ մասին, այլապես ամսվա վերջում կզրկվեք նախատեսված հաճելի գնումներ կատարելու հնարավորությունից: Եվս մի քանի օգտակար խորհուրդներ Ամսեկան բյուջեն պետք է պլանավորել աշխատավարձն ստանալու օրը: Ոչ մի դեպքում «շրջայց» մի՛ կատարեք խանութներով աշխատավարձ ստանալու օրը, երբ ձեզ մոտ է ամբողջ աշխատավարձը: Նույնիսկ ամենազուսպ մարդիկ կարող են չդիմանալ գայթակղությանը և կատարել չմտածված գնումներ: Այս կանոնը կարող է ծիծաղելի թվալ, բայց հաշվի’ առեք. երբեք մի՛ մտեք մթերային խանութ գնումների` դատարկ ստամոքսով: Ամեն ամիս վերլուծե՛ք ձեր ծախսերը, առանձնացրե՛ք ամենախոշորներն ու կարևորները, կրճատե’ք «ոչ անհրաժեշտների» ցանկը: Տարածել... Նմանատիպ նյութերՆոր նյութերՄիացեք մեզ YouTube-ում... 80հզ.+ բաժանորդ
| Դիտումներ: 2216 |
| | |