21:13 Ծխելու կանոնները | |||
Թեև ծխողները չեն ցանկանում հրաժարվել այդ վնասակար սովորույթից, այնուամենայնիվ, պետք է միշտ հիշեն, որ բացի իրենց առողջությունից, վտանգում են նաև շրջապատի մարդկանց առողջությունը: Չծխողների համար տհաճ է ծխախոտի հոտը, ուստի խորհուրդ է տրվում նախքան ծխելը թույլտվություն ստանալ ներկաներից: Հարգի չէ որևէ հաստատություն մտնել ծխախոտը ձեռքին: Հյուրընկալվելիս պետք է ծխելու թույլտվություն ստանալ ներկաներից և շնորհակալություն հայտնել: Եթե այնտեղ, որտեղ հրավիրված եք, արդեն ծխում են, ապա թույլտվություն պետք է խնդրեք ձեր կողքի նստածից, իհարկե սկզբում նրան ծխախոտ առաջարկելով: Եթե հյուրը ծխող չէ, տանտերը նրա ներկայությամբ չպետք է ծխի: Ծխել չի կարելի. • այնտեղ, որտեղ փակցված է ծխելն արգելող հայտարարություն, • այնտեղ, որտեղ հայտարարություն չկա, բայց առանց դրա էլ հայտնի է, որ ծխել չի կարելի՝ թատրոնում, կինոսրահում, բենզալցման կայանում, հանրախանութում, հիվանդանոցային սենյակում, քննական լսարանում և այլն, • բնակարան, հիմնարկ, խանութ, հասարակական տրանսպորտ մտնելիս, • այն սենյակում, որտեղ հիվանդ կամ փոքր երեխա կա, • պարելիս, • ճաշելիս, ապուրի և երկրորդ ճաշատեսակի միջև ընկած ժամանակահատվածում, • հանդիսավոր նիստերի ժամանակ, • կանանց՝ փողոցում, • եկեղեցում կամ որևէ ծիսակատարության ժամանակ, • գերեզմանոցներում: • Չպետք է ծխել նաև ննջարանում: Վիճակագրություն Հայաստանում ծխում է չափահաս բնակչության 50 տոկոսը: Հասարակական վայրերում մոխրամանների առկայությունը հուշում է, որ ծխելը թույլատրվում է: Եթե ռեստորանի կամ ճաշարանի սեղանին մոխրամաններ չկան, ուրեմն ծխելն արգելվում է, և չափազանց անքաղաքավարի է նման վայրերում ծխելը և սուրճի ափսեները, բաժակները կամ ծխախոտի տուփերը մոխրամանի փոխարեն օգտագործելը: Սեղանի շուրջ կարելի է ծխել այն դեպքում, երբ բոլորն արդեն ավարտել են ուտելը, և երբ տանտերը կամ սեղանակիցները թույլ են տվել: Նույն սեղանի շուրջ օտար մարդկանց հետ ճաշելիս (ճաշարանում, սրճարանում, ռեստորանում) չպետք է ծխել այնքան ժամանակ, մինչև բոլորը ավարտեն ճաշելը: Եթե ծխում եք, իսկ սեղանակցի համար նոր են սպասք բերում, պետք է իսկույն հանգցնել ծխախոտը: Պաշտոնական ընդունելությունների ժամանակ առաջինը սկսում են ծխել տարեցներն ու պատվավոր հյուրերը, հետո միայն՝ մյուսները: Երբեք չի կարելի մեկի տուն մտնել վառած ծխախոտը կամ ծխամորճը ձեռքին: Ծխախոտը բերանին խոսելն անքաղաքավարի է: Բարևելիս միշտ պետք է ծխախոտը հանել բերանից: Անքաղաքավարի է ծխախոտը վառել այն ժամանակ, երբ ձեզ հետ խոսում են: Ո՞վ ում է առաջարկում ծխել Նախկինում ընդունված էր, որ ծխել առաջարկում է հասարակական ավելի ցածր դիրք ունեցողը՝ ավելի բարձր դիրք ունեցողին, տղամարդը՝ կնոջը, երիտասարդը տարեցին: Մեր ժամանակներում, առանց տատանվելու, ծխել կարող է առաջարկել նաև կինը՝ որևէ տղամարդու (իհարկե ցանկալի է, որ կանայք ծխախոտ չառաջարկեն տարեց տղամարդկանց, որովհետև նրանք ավելի պահպանողական են) կամ ղեկավարը՝ իր ենթականերին: Եթե ծխող եք, և ծխախոտ են առաջարկում, պետք է վերցնել և շնորհակալություն հայտնել, բացառիկ դեպքերում կարելի է հրաժարվել, եթե, ասենք, առաջարկում են ուժեղ տեսակի ծխախոտ, իսկ դուք սովոր եք ավելի թույլը ծխել: Ծխախոտը կամ սիգարը միշտ հրամցնում են տուփից: Երբ տղամարդուն ծխախոտ են առաջարկում կանգնած, նա ևս պետք է կանգնի: Ծխախոտը պետք է վառել կրակայրիչով կամ լուցկիով, ծխախոտով վառելն անքաղաքավարի է: Երբեք չպետք է ծխախոտը հանգցնել որևէ կենցաղային առարկային՝ աթոռին, սեղանին... սեղմելով: Մոխիրը պետք է թափել միայն մոխրամանում: Ի դեպ, չպետք է մոխրամանի մեջ թուղթ կամ ուտելիքի մնացորդ գցել: Ծուխը փչում են այն ուղղությամբ, որ այն չանհանգստացնի ուրիշներին: Ծխողները պետք է հետևեն նաև հետևյալ կանոններին: Չպետք է՝ • հաճախակի ծխախոտ խնդրել ուրիշներից, • լուցկին կամ կրակայրիչը նետել սփռոցին կամ հատակին, • ծխախոտը ծխել մինչև ֆիլտրին հասնելը, • վառած ծխախոտն առաջարկել ուրիշին, • ծխամորճը թափ տալ ուրիշների ներկայությամբ, • հյուրերին ընդունել կամ նրանց հետ խոսել ծխախոտը բերանում, ծխախոտ վառել բաժակաճառի կամ ելույթի ժամանակ: Տարածել... Նմանատիպ նյութերՆոր նյութերՄիացեք մեզ YouTube-ում... 80հզ.+ բաժանորդ
| |