10:15 Այցելուների ընդունելությունը աշխատավայրում | |
Այցելուները հիմնարկի աշխատողից ակնկալում են գործնականություն, սիրալիրություն, օգնելու պատրաստակամություն, արագաշարժություն: Պատրաստակամ աշխատողը սիրալիր հարցուփորձ է անում այցելուին, պարզում նրա նպատակը և համապատասխան օգնություն ցույց տալիս:  Հիմնարկի հետ առնչվելիս այցելուները նույնպես պետք է պահպանեն քաղաքավարության կանոնները: Այցելուն էլ իր հերթին պետք է աշխատողին քաղաքավարի և սիրալիր վերաբերվի և իր ասելիքը շարադրի պարզ ու հստակ: Հիմնարկի մուտքի դուռը աշխատեք չշրխկացնել, իսկ աշխատասենյակ մտնելիս հարկ է դուռը թակել, ներս մտնելիս մի զլացեք բարևել: Երբ ընդունարանում աշխատող է նստած (կամ աշխատողներ), ոչ մի դեպքում չի կարելի գնալ ուղիղ տնօրենի սենյակ` պատճառաբանելով, թե նրա հետ եք ուզում զրուցել: Երբ այցելուն տեսնում է, որ աշխատողը դրամ է հաշվում կամ հաշվարկ է անում, պետք է սպասի, մինչև վերջինս ավարտի, հետո նոր դիմի նրան: Այցելուն պետք է խոսի սիրալիր տոնով. Հիշե'ք. սիրալիր տոնը մեծացնում է գործի հաջողությունը: Հարկ է միշտ գործածել քաղաքավարության տարրական արտահայտություններ. «Շնորհակալություն», «Խնդրեմ»… Սովորաբար ղեկավարն այցելուին ընդունելիս ոտքի չի ելնում: Նա կարող է այցելուին խոսքով կամ ժեստով հասկացնել, որ նա նստի: Սակայն կանանց կամ տարեց մարդկանց ընդունելիս ցանկալի է, որ ղեկավարը ոտքի ելնի և այցելուին ուղեկցի դեպի աթոռը: Այցելուին ընդունելիս ղեկավարն ինքն է ընտրում նրա հետ հաղորդակցվելու ոճը: Պաշտոնական հաղորդակցման դեպքում իր աշխատասեղանի առջև նստած ղեկավարը, ողջունելով այցելուին, ներս է հրավիրում նրան և առաջարկում նստել: Ընդունելության ժամանակն ու շփման բնույթը որոշում է ղեկավարը: Ոչ պաշտոնական հաղորդակցության դեպքում ղեկավարն այցելուին ողջունում է տեղից վեր կենալով և հրավիրում է նստել կոլեգիալ աշխատասեղանի մոտ, իսկ ինքը նստում է այցելուի դիմաց: Հանդիպման և զրույցի տևողությունը կախված է կողմերի փոխադարձ պայմանավորվածությունից: Ընկերական հաղորդակցության դեպքում ղեկավարն այցելուին դիմավորում է սենյակի կենտրոնում և ողջունելուց հետո առաջարկում է նստել հանգստի համար նախատեսված բազմոցին: Ղեկավարների մեծամասնությունը ցանկանում է կրճատել այցելուների ընդունելության համար նախատեսված ժամանակը, քանի որ հաճախ են հանդիպում այնպիսի այցելուներ, ովքեր ավելորդ դատարկաբանություններով անհանգստացնում են ղեկավարներին և խլում նրանց ժամանակը: Նման իրավիճակներից խուսափելու համար ղեկավարը պետք է որքան հնարավոր է արագ պարզի այցի նպատակը (առաջարկ, խնդրանք): Ռուս հոգեբան Վլասովան ղեկավար աշխատողներին խորհուրդ է տալիս վարվել հետևյալ կերպ.  • Ուշադի'ր լսեք այցելուին: Երբ այցելուն ձևակերպում է իր ասելիքը, աշխատեք հուզականորեն ապրումակցել և աջակցել նրան ( գլխով արեք, ժամանակ առ ժամանակ ասեք` «Ես ձեզ լսում եմ», «Շարունակեք», «Այո', այո'» և այլն: • Փորձեք խնդիրը պարզել հետևյալ հարցերի օգնությամբ. «Եթե ես ձեզ ճիշտ հասկացա, ապա…», «Դուք նկատի ունեք…», «Այսինքն` դուք կարծում եք, որ…»: • Ճշտեք այն բոլոր գործոնները, որոնցից կախված է հարցի լուծումը և ձևակեերպեք հարցի լուծման տարբերակը: Ցանկացած խնդրի լուծումը հարկավոր է գտնել այցելուի հետ, ոչ թե նրա գնալուց հետո, որպեսզի այն վերջական լինի: (Այսինքն` նախապես կարող եք իմանալ այցելուի կարծիքը խնդրի լուծման այդ տարբերակի մասին և այդպիսով խուսափել ավելորդ հանդիպումից): • Երբ այցելուն ձևակերպում է իր խնդիրը, հարցրեք, թե ինքն ինչպիսի լուծում է ակնկալում: Եթե այցելուն ագրեսիվ է տրամադրված և լարված է, աշխատեք թոթափել նրա լարվածությունն ու բացասական հույզերը փոխարինել դրականով: Դրան կարելի է հասնել հարգալից, սիրալիր ու բարյացակամ վերաբերմունքով: Խորհուրդ չի տրվում նյարդայնացած այցելուին հանգստացնել. «Մի' հուզվեք, խնդրում եմ…» «Հանգստացե'ք»… Այսպիսի փորձերը ավելի կխորացնեն նրա լարվածությունը: Նման իրավիճակում ավելի լավ է անկեղծ տրամադրվածություն և օգնելու պատրաստակամություն դրսևորեք: Կարելի է նաև հարցնել. «Իսկ ինչպե՞ս կվարվեիք դուք իմ փոխարեն…»: • Իր աշխատակիցների ընդունելությունը ղեկավարը կարող է հստակ կերպով կարգավորել` յուրաքանչյուր աշխատակցի համար ընդունելության որոշակի ժամ նշանակելով: Աշխատակիցների ընդունելություններին հատկացված ժամանակը կարելի է կրճատել և դրա փոխարեն պարբերաբար աշխատանքային կամ կազմակերպչական հարցերի շուրջ խորհրդակցություններ կազմակերպել: Տարածել... Նմանատիպ նյութերՆոր նյութերՄիացեք մեզ YouTube-ում... 80հզ.+ բաժանորդ
| |
|
| |