20:23 Կարիերան և ընտանիքը կնոջ կյանքում | |
Հնուց եկող կարծրատիպը կնոջ դերի մասին մինչև այսօր էլ մնում է մեր ենթագիտակցության մեջ: Անկասկած, իր բնությամբ կինը նախևառաջ մայր է, օջախի պահապան: Տղամարդիկ հայթայթողներ են ու զինվորներ: Կնոջ գործառույթն է` կայունացնել, պահել-պահպանել եղածն, ինչպես կա: Տղամարդկային ներուժն ուղղված է դեպի փոփոխություններն ու հեղաշրջումը: Բնության հետ դժվար է վիճել:
 Իսկապես, նշանավոր գիտական հայտնագործությունները, արվեստի գլուխգործոցները ստեղծել են տղամարդիկ: Երկրի ամենահարուստ բնակիչները կրկին տղամարդիկ են… Այնուամենայնիվ, այսօր կանայք հակադրվում են բնությանը և կոտրում կարծրատիպերը: Նրանք ավելի հաճախ են հրաժարվում միայն տանը նստելուց ու երեխաներ մեծացնելուց, չեն բավարարվում ընդամենը տղամարդուն ուղղորդող «պարանոցի» դերով, այլև ցանկանում են ստանձնել «գլուխ» լինելու պատասխանատվությունը:
Կնոջ բնությունը
Ժողովրդական իմաստությունը կնոջ բնության մասին ասում է` «Աստված չստեղծեց կնոջը տղամարդու ոտքից, որպեսզի դրանով նվաստացրած չլինի: Չստեղծեց գլխից, որպեսզի նա չգերազանցի տղամարդուն: Արարիչը կնոջը ստեղծեց կողոսկրից, (որը սերտ միացած է մյուս կողոսրկրին) որպեսզի նա հավասարության մեջ գտնվի տղամարդու հետ»:
Բացի այդ, կողոսկրը գտնվում է ձեռքի տակ: Դրանով Տերը հուշեց, որ տղամարդը պետք է պաշտպանի ու փայփայի կնոջը: Եվ վերջապես, այն գտնվում է սրտի շրջանում, իսկ դա վկայում է այն, որ կինը պետք է սիրված լինի տղամարդու կողմից»:
Անխոս, ժողովրդական իմաստությունը գեղեցիկ է բովանդակությամբ: Բայց արդյոք միշտ է այն համապատասխանում իրականությանը… Ցավոք, ոչ: Եվ դրա պատճառները բազմաթիվ են:
Ինչու՞ են կանայք ստանձնում հայթայթողի դերը
Նախ` ոչ բոլոր կանայք են ցանկանում կին մնալ, ուստի փորձում են իրենց տղամարդու դերում: Նրանք կան բոլոր ոլորտներում` բիզնեսում, գիտության մեջ, քաղաքականության մեջ, ղեկին… Լավագույն դեպքում դրա պատճառն այն է, որ որոշակի ներքին պոտենցիալ առաջ է մղվում և պահանջում իրացում: Կինը մտածում է, որ ինքն էլ արժանի է դառնալու անհատականություն, օգտակար լինել ոչ միայն ընտանիքում, այլև հասարակության մեջ, ապրել իր հետաքրքրությունների և հայացքների համաձայն:
Բայց, ինչպես ասում են, մի գդալ աղը կաթսայում կարող է քիչ լինել, իսկ ափսեի մեջ շատ է: Ուստի պետք է առաջնորդվել «ոսկեմիջինի» օրենքով: Առաջին հերթին կինը պետք է մտածի ընտանիքի, ապա` կարիերայի ու անձնական աճի մասին:
Կնոջ «առնականացման» մյուս պատճառը հաճախ կողակցի բացակայությունն է կամ էլ կողքին գտնվող այնպիսի տղամարդը, ում «անունը կա, ամանում չկա»: Տրամաբանական է, որ երբ կողակիցը չի իրականացնում պաշտպանի, հայթայթողի գործառույթները, կինն ինքն է ստանձնում այդ պարտականությունները, քանի որ ստիպված է դա անել:
Ինչ է տեղի ունենում այս դեպքում: Կինն աշխատում է, որպեսզի կերակրի ընտանիքը, բավարար ժամանակ չի տրամադրում երեխաներին, հոգնում է: Եվ գլխավորը` նման իրականությունն իր սրտով չէ, այլ պարտադրված է իրեն: Դժվար թե նա երազում էր այս մասին: Արդյունքում կինը դադարում է ապրել իր ընտանիքով, անձնական կյանքով. նա տարված է աշխատանքով, կարիերայով: Բոլորին ասում է, որ ժամանակը չի հերիքում, շնչելու ժամանակ չկա, ժամանակ չկա «կին լինելու» համար:
Իսկ երբ տուն է վերադառնում, հանում է բիզնես-լեդիի դիմակն ու ցածր լալիս: Այո, նա ունի սիրո, հոգածության, աջակցության կարիք, բայց այդ ամենին պարզապես էլ չի հավատում:
Ընտանիք, թե կարիերա. ինչպես կատարել ճիշտ ընտրություն
Կանայք, ինչպես տղամարդիկ, տարբեր են: Ոմանք երազում են հաջող ամուսնանալ, երեխաներ ունենալ և երջանիկ են զգում մոր, քնքուշ կնոջ ու օջախի պահապանի դերում: Մյուսներն իրենց կյանքը չեն պատկերացնում առանց աշխատանքի, առաջընթացի կարիերայում, առանց հասարակական գործունեության… Բայց և առաջինները, և երկրորդներն ունեն իրավունք` լինելու երջանիկ:
 Կանանց խորհուրդ է տրվում բացարձակ անկեղծ պատասխանել մի շատ կարևոր հարցի` «Դուք ձեզ երջանիկ զգու՞մ եք»: Եթե պատասխանը դրական է, ուրեմն` ձեր կատարած ընտրությունը ճիշտ է` լինի ընտանիք, թե կարիերա: Իսկ միգուցե կարողանում եք հաջող համատեղել և այն, և այն` հաճույք ստանալով կյանքի հագեցած ու ակտիվ ռիթմից:
Սխալ ընտրության հետևանքները
Եթե կարիերան կարևորագույն տեղ է գրավում ձեր կյանքում, ամենայն հավանականությամբ դուք բազմաթիվ ընտանեկան խնդիրների կբախվեք: Ի հայտ է գալիս փոխըմբռնման բացակայություն ամուսնու, երեխաների կողմից, մեղադրանքներ, կոնֆլիկտներ… Իսկ երբ գիտակցեք ձեր թերացումը, դժվար կլինի ուղղել սխալների արդեն ամբողջ շարքը, որոնց սերմը հենց դուք եք դրել:
Եթե «տանե կին» եք, կրկին պետք է խորը մտածեք: Տղամարդկանց հետաքրքրում են կանայք, ովքեր զբաղվում են էլի ինչ-որ բանով` բացի տունն ու երեխաները: Ձեզ համար ինչ-որ հոբբի, զբաղմունք գտեք: Չէ որ ոչ այդքան բարդ, հոգեհարազատ աշխատանքը կարելի է համատեղել կնոջ պարտականությունների հետ: Ձեզ, անշուշտ, հաճելի կլինի ամուսնուն ու երեխաներին պատմել ձեր դրական արդյունքների և ձեռքբերումների մասին:
Շատ ավելի բարդ վիճակ է բաժին ընկնում այն կանանց, ովքեր երջանիկ կլինեին` նստելով տանն ու երեխաներով զբաղվելով, բայց ամուսինն իրեն չի արդարացնում: Եվ նրանք ստիպված են և աշխատել ընտանիքի ապրուստը հայթայթելու համար, և հասցնել տան գործերը: Իսկ դա, իհարկե, շատ դժվար է:
Ամենակարևորը ինքդ քեզնից «գլուխ հանելն է», հասկանալը` որն է ձեզ համար ավելի կարևոր` կարիերան, թե ընտանիքը:
Հենց դա անելու համար առաջարկում ենք անցնել այս թեսթը, որն այդպես էլ կոչվում է`
ԹԵՍՏ.
Ի՞նչն է ձեզ համար ավելի կարևոր. ընտանիքը, թե կարերան
1. Ո՞վ է տնօրինում ընտանեկան բյուջեն.
ա/ Իհարկե, ամուսինս:
բ/ Բոլոր ֆինանսական հարցերը լուծում եմ հիմնականում ես:
գ/ Ես և ամուսինս միասին:
2. Հաճա՞խ եք տանը կերակուր պատրաստում.
ա/ Այո, ես շատ եմ սիրում խոհանոցը և աշխատում եմ միշտ նոր բաղադրատոմսեր գտնել:
բ/ Ոչ, ժամանակս դրա համար չի հերիքում:
գ/ Ոչ հաճախ, բայց պատրաստում եմ:
3. Ինչի՞ հետ է կապված «հաջողակ լինել» հասկացությունը ըստ ձեզ.
ա/ Տան, ընտանիքի, երեխաների հետ:
բ/ Կարիերայի և նյութական ապահովության հետ:
գ/ Աշխատավայրի և տան գործերը համատեղելու հետ:
4. Երեխայի հետ միասին զբաղվու՞մ եք տնային առաջադրանքով.
ա/ Մենք միշտ միասին ենք պարապում, ես ամեն ինչ մանրակրկիտ ստուգում եմ:
բ/ Հազվադեպ, անում եմ դա, որպեսզի տեղյակ լինեմ նրա առաջադիմությունից դպրոցում:
գ/ Փորձում եմ վերահսկել նրա ուսման գործընթաց:
5. Հաճա՞խ եք ժամանակ անցկացնում ամուսնու հետ.
ա/ Երբ նա ազատ է լինում, միշտ:
բ/ Ըստ հնարավորության. կախված է աշխատանքային գրաֆիկից:
գ/ Այո, մենք աշխատում ենք հաճախ լինել միասին:
6. Դուք կատարու՞մ եք ձեր տնային պարտականությունները.
ա/ Այո, ես հենց դրանով էլ զբաղվում եմ:
բ/ Հազվադեպ, հիմնականում դա անում է տնային աշխատողը (դուստրս):
գ/ Մենք ամուսնուս հետ կիսել ենք այդ գործերն իրար մեջ:
7. Սիրում եք հեռուստատեսային սերիալներ.
ա/ Այո', փորձում եմ իմ սիրած սերիալների ոչ մի մաս բաց չթողնել:
բ/ Բոլոր այդ սերիալներն ինձ համար չեն:
գ/ Մեկ-մեկ նայում եմ, եթե ինձ հետաքրքրում է:
8. Կարո՞ղ էիք միայնակ (առանց ամուսնու) դաստիարակել երեխային.
ա/ Ինձ համար շատ ծանր կլիներ:
բ/ Կարծում եմ, որ գլուխ կհանեի:
գ/ Բարեկամներիս ու ընկերներիս օգնությամբ:
9. Ինչի՞ մասին եք հիմնականում պատմում ընկերուհիներին սուրճի սեղանի շուրջ.
ա/ Ընտանիքիս, տան կահավորման, նոր իրերի, նոր բաղադրատոմսերի մասին:
բ/ Աշխատանքիս, գործընկերների հետ խնդիրների, իմ ձեռքբերումների մասին:
գ/ Ընտանիքիս, հոբբիիս, ընդհանուր առմամբ կյանքի մասին:
10. Հաճա՞խ եք տատիկին, դայակին խնդրում նստել երեխայի հետ.
ա/ Ըստ էության` ոչ: Ես միշտ երեխայի հետ եմ:
բ/ Գրեթե միշտ, ես այլ ելք չունեմ:
գ/ Ոչ հաճախ, բայց լինում է:
11. Դուք բավարար ժամանակ տրամադրու՞մ եք քնին.
ա/ Փորձում եմ լիարժեք քնել:
բ/ Անհրաժեշտությունից ելնելով` քնում եմ գոնե 4-5 ժամ:
գ/ Ինձ համար միշտ ժամանակ կա հանգստի համար:
12. Ինչպե՞ս եք վերաբերվում կանացի և տղամարդկային պարտականությունների մասին կարծրատիպերին.
ա/ Դա հարմար տարանջատում է:
բ/ Ամեն ընտանիք ինքն է որոշում դրվածքը:
գ/ Կախված է զբաղվածության աստիճանից, իրավիճակից:
13. Պատրա՞ստ եք ընկերոջ, ծանոթի «ոտքի տակը փորել” հանուն կարիերային.
ա/ Աշխատանքն ընդամենը եկամտի աղբյուր է:
բ/ Պատրաստ եմ պայքարել պաշտոնի, առաջընթացի համար, բայց ոչ ընկերության գնով:
գ/ Կախված է իրավիճակից:
14. Ի՞նչ նպատակով եք հիմնականում օգտագործում ինտերնետը.
ա/ Ժամանցի և ինքնակրթության համար:
բ/ Որպես աշխատանքային «գործիքներից» մեկը:
գ/ Շատ տարբեր. այսօր այն մեր կյանքի անբաժանելի մասն է:
15. Ինչպե՞ս եք վերաբերվում գերադաս աշխատողի` ձեզ արված դիտողություններին.
ա/ Ես չեմ աշխատում:
բ/ Բացասաբարաբար, բայց զուսպ:
գ/ Նորմալ, եթե դրանք արդարացի են:
16. Կհամաձայնեի՞ք երկարատև գործուղման, եթե արդյունքում պաշտոնի բարձրացում պետք է լիներ.
ա/ Ոչ, ես ոչ մի պարագայում երկարատև չէի հեռանա ընտանիքից:
բ/ Այո, առանց որևէ կասկածի:
գ/ Միգուցե, բայց անպայման ընտանիքիս հետ խորհրդակցելով:
ԹԵՍՏԻ ԱՐԴՅՈՒՆՔՆԵՐԸ
Եթե ձեր պատասխանների մեջ գերակշռողը «ա» տարբերակն է, ապա, անկասկած, ձեզ համար գլխավորն ընտանիքն է: Եթե անգամ հետաքրքրում է կարիերան` որպես այդպիսին, ապա խոսքն ամուսնու աշխատանքի մասին է: Ամեն ինչ նորմալ է. դուք լավ կին եք, մայր ու տնտեսուհի: Բայց արժի, որ ավելի շատ ժամանակ տրամադրեք հենց ձեզ, գտնեք հետաքրքիր զբաղմունք: Սխալ է ապրել միայն երեխաների և ամուսնու կյանքով: Մարդու համար անհրաժեշտ է անընդհատ աճելն ու զարգանալը:
Մտածե'ք, միգուցե վաղուց պետք էր ձեռքի հետ մի աշխատանքով զբաղվել, կամ էլ խորանալ ստեղծագործական ոլորտում: Բայց սխալ կլինի կտրուկ փոխել ձեզ համար սովորական դարձած առօրյան:
Եթե ձեր պատասխաններում գերակշռում է «բ» տարբերակը, վստահաբար, ձեզ համար առաջնայինը կարիերան է: Հնարավոր է` դուք ապրում եք աշխատանքով, որովհետև դրանից հաճույք եք ստանում: Բայց մի մոռացեք ընտանիքի մասին, դա լիակատար երջանկություն է: Ձգտեք ճիշտ բաշխել ձեր ժամանակը: Անհնար է աշխատել բոլոր փողերը, բայց` շատ հեշտ ներվային տագնապ ստանալը մշտական անքնության ու աշխատանքային սթրեսի արդյունքում: Էլ չենք խոսում այն մասին, որ կդադարեք լեզու գտնել ձեզ հարազատ մարդկանց հետ:
Հնարավոր է` դուք աշխատանքային բարձունքների եք ձգտում, քանի որ ստիպված եք և իրավունք չունեք հիշել «հոգնել» բառը: Այդ դեպքում վերանայեք ձեր կենսական նպատակները: Չէ որ կարևոր է երջանիկ կին լինելը: Հավատացեք կանացի երջանկությանը, ամեն ինչ դեռ հնարավոր է փոխել: Շատ հնարավոր է, որ ձեր կյանքում հայտնվի մի արժանի տղամարդ, ով թույլ չի տա ձեզ «լծկան եզի» պես առավոտից երեկո աշխատել:
Եթե ձեր պատասխանների մեծ մասը համընկել է «գ» տարբերակին, շնորհավորում ենք: Դուք փորձում եք պահպանել «ոսկեմիջինը»: Կարիերան երբեք ընտանիքից ավելի կարևոր չի լինի ձեզ համար, բայց աշխատանքի մեջ էլ դուք բավականաչափ հաջողակ եք: Դուք, իհարկե, աննախադեպ հայտնագործություններ չեք անի, միլիոններ չեք աշխատի, բայց կպահպանեք ընտանիքի բարեկեցությունը, ձեր նյարդերն ու անհատականությունը:
Տարածել... Նմանատիպ նյութերՆոր նյութերՄիացեք մեզ YouTube-ում... 80հզ.+ բաժանորդ
| |
|
| |