Փարավոնների երկիր Եգիպտոսը
| 04.05.2015, 09:26 | |||||||
Դուք դեռ չե՞ք եղել Եգիպտոսում: Այսինքն` չեք զբոսնել Փարավոնների հովտում, չեք հիացել բուրգերով և առեղծվածային Սֆինքսով և, ամենակարևորը, դեռ չեք ճաշակել Կարմիր ծովի վայելքները:
 Ինչեր ասես, որ չի տեսել այս հինավուրց երկիրը: Այստեղ ստրկության մեջ ապրել է Մովսեսը և ծնողների հետ ճանապարհորդել է մանուկ Հիսուսը: Այնպես որ ամենաբարձր ուժերը դեռ վաղուց են մեծ պատասխանատվություն դրել այս երկրի վրա: Եվ սա, անշուշտ, մտորելու տեղիք է տալիս: Արևը` աստվածային Ռայի կառքը, ջերմացնում է եգիպտացիներին կլոր տարի: Այդ պատճառով էլ, թեկուզ մեկ անգամ լինելով այստեղ, անհնար է մոռանալ Եգիպտոսի ջերմ և բոցավառ գրկախառնությունները: Բացի հինավուրց պատմությունից, փարավոնների հայրենիքը հպարտանում է նաև իր հանրահայտ գետով: Զմրուխտե ժապավենի պես Նեղոսը հոսում է Եգիպտոսի գրեթե ողջ տարածքով, իսկ ոսկեգույն անապատն ասես գուրգուրում է նրա ափերը: Հին աշխարհի պատմության ամենանշանակալից իրադարձությունները տեղի են ունեցել Նեղոս գետի մերձակայքում:  Հենց այստեղ են վեր խոյանում հուշարձաններ, որոնք ավելի քան հինգհազարամյա պատմություն ունեն: Նեղոս սուրբ գետով ճանապարհորդելիս զբոսաշրջիկները զմայլվում են հին ժամանակների ականատեսներով` Գիզայի բուրգերով, առեղծվածային ժպտացող Սֆինքսով և պատմական պեղումներով: Հիացմունքի արժանի Լուքսորը, որը դարեր ի վեր եղել է փարավոնների երկրի մայրաքաղաքը, իսկ այժմ հայտնի է շքեղ զբոսայգիներով և Կառնակի տաճարով: Անհնար է անտարբեր անցնել Փարավոնների հովտով, որտեղ գտնվում են Հին Եգիպտոսի տիրակալների դամբարանները: Ապշեցնում է այն, որ այսօրվա շատ քաղաքակրթություններից տարեց պատերի մանրանկարները այնպիսի վառ գույներով են շողշողում, կարծես հենց երեկ են նկարվել: Զբոսաշրջիկների զարմանքն են հարուցում նաև Ասուանի հնագույն ջրամբարը, Աղա-խանի դամբարանը և Աբու-Սիմբելի տաճարները, որոնց հսկա հուշարձանները ժամանակակից երկնաքերեր են հիշեցնում:  Հ.Գ. Հանգստի համար ամենալավ ժամանակը ապրիլ, մայիս, հոկտեմբեր և նոյեմբեր ամիսներն են: Մյուս ամիսներին կա΄մ շատ շոգ է, կա΄մ անընդհատ ուժգին քամիներ են փչում: Ամենալավ լողափերը Հուրգադայում են, Շարմ-Էլ-Շեյխում և Դահաբում:
Տարածել... Նմանատիպ նյութերՆոր նյութերՄիացեք մեզ YouTube-ում... 80հզ.+ բաժանորդ
| Դիտումներ: 2238 | Բեռնումներ: 0
| | | |||||