23:17 Խաղողն առավել, քան օգտակար է | |||
Խաղողի առողջարար հատկությունների մասին հայտնի է եղել դեռևս շատ վաղուց: Ըստ Աստվածաշնչի՝ ջրհեղեղից հետո Արարատ լեռան ստորոտին աճեցված առաջին բույսը եղել է հենց խաղողը: Իսկ Հին հույներն ու հռոմեացիները դեռևս մեր թվարկությունից առաջ կիրառում էին խաղողաբուժությունը՝ որպես ուժերի վերականգնման և օրգանիզմում նյութափոխանակության կարգավորման միջոց:
Այն նաև լավ միջոց էր համարվում անգինայի, բերանի խոռոչի խոցի և այլ հիվանդությունների բուժման համար: Իսկ խաղողի հյութը միշտ համարվել է թուլացնող, ընդհանուր ամրապնդող, խորխաբեր և միզամուղ միջոց: Մասնավորապես, չհասունացած խաղողի հյութը շատ լավ միջոց է մարմնի ջերմաստիճանի իջեցման, ինչպես նաև՝ կոկորդի ողողումներ անելու համար:
 Բժշկության մեջ խաղողը կիրառվում է գրեթե ամբողջությամբ՝ սկսած կեղևից, վերջացրած տերևներով: Այս յուրօրինակ հատապտուղը պարունակում է մեծ քանակությամբ միկրոէլեմենտներ և հանքային աղեր (ցինկ, կալցիում, երկաթ, պղինձ և այլն): Շնորհիվ կալիումի մեծ պարունակության՝ խաղողը հատկապես օգտակար է համարվում սրտային հիվանդների համար: Այն կարգավորում է սրտի բաբախումների ռիթմը, կանխում է շնչահեղձությունը, իջեցնում է բարձրացած արյան ճնշումը: Խաղողը խորհուրդ է տրվում սակավարյունությամբ տառապող մարդկանց, քանի որ նպաստում է էրիտրոցիտների քանակի աճին, հեմոգլոբինի բարձրացմանը և այլն:
Խաղողի ճյուղերի հետազոտությունները ցույց են տվել, որ դրանք նույնպես պարունակում են բազում օգտակար բաղադրիչներ և ներկայում դրանք հաջողությամբ օգտագործվում են ինչպես ֆորմալ, այնպես էլ ժողովրդական բժշկության մեջ բազմաթիվ հիվանդություններից ապաքինման և օրգանիզմի պրոֆիլակտիկ ամրապնդման նպատակներով:
Միևնույն ժամանակ խաղողի ճյուղերը շատ լավ հումք են հանդիսանում կոսմետոլոգների համար: Օրինակ, խաղողի ճյուղերի յուղով պատրաստված օճառահեղուկը նպաստում է մազերի ամրացմանն ու վերականգնմանը, իսկ նույն յուղով մերսումը հրաշալի միջոց է նուրբ և հարթ մաշկ ունենալու համար:
Ինչ վերաբերում է խաղողի տերևներին, ապա դրանք հարուստ են ասկորբինաթթվով և շատ հաճելի համ կարող են հաղորդել ցանկացած աղցանին, որը դուք կպատրաստեք: Հայկական խոհանոցում դրանք լայնորեն կիրառվում են հռչակավոր թփով դոլմայի պատրաստման ժամանակ:
Խաղողի չորացրած տերևներն օգտագործվում են բուժական նպատակներով: 1 ճաշի գդալ խաղողի չորացրած և մանրացրած տերևները լցրեք 1 բաժակ եռացրած ջրի մեջ և թողեք մոտ 20 րոպե: Ստացված լուծույթը օրական 2-3 անգամ 1/2 բաժակի չափով խմելը շատ օգտակար միջոց է անգինայի, ֆարինգիտի, լարինգիտի ժամանակ:
Այնուամենայնիվ, խաղողի հիմնական հարստությունը նրանում պարունակվող գլյուկոզան և ֆրուկտոզան են: Խաղողի հատիկների մեջ պարունակվող շաքարը էապես չի փոփոխվում մարսողության ժամանակ և անմիջապես ներծծվում է արյան մեջ, ինչը բարերար ազդեցություն է ունենում մկանային տոնուսի վրա՝ ուժեղացնելով սրտամկանի կծկումներն ու արագացնելով օրգանիզմի նյութափոխանակությունը, ինչպես նաև լայնացնելով արյունատար անոթները:
4 կգ թարմ խաղողը կամ 1 կգ չամիչը կարող են ձեզ ապահովել էներգիայի այնպիսի պաշարով, որը կբավարարի ամբողջ օրվա ընթացքում: Իսկ 1 բաժակ խաղողահյութում պարունակվող B վիտամինի պաշարը, որը նույնպես բավարար է ողջ օրվա նորման լրացնելու համար, ձեզ կօգնի ոչ միայն խուսափել դեպրեսիաներից ու բազմաթիվ սթրեսներից, այլև թույլ կտա իսպառ մոռանալ ատելի թարախաբշտիկների ու թեփի մասին, ձեր մազերին կհաղորդի առողջ փայլ, իսկ եղունգներին՝ ամրություն:
Չնայած խաղողի կալորիականությանը (100 գր-ում պարունակվում է 65-85 կկալ)՝ այն հանդիսանում է բազմաթիվ դիետաների հիմնական բաղադրիչը, քանի որ օրգանիզմից արտամղում է վնասակար արգասիքները և օգնում է ազատվել ավելորդ կիլոգրամներից:
Հիշեք, որ խաղողի համար վատ դաշնակիցներ են կաթնամթերքները, ճարպերով և աղով հարուստ սնունդը, չորացրած մրգերն ու բանջարեղենը, ինչպես նաև՝ ոգելից խմիչքները և գազով ըմպելիքները: Դրանց համադրությունը ստամոքսում կարող է իսկական հեղափոխություն առաջացնել:
Բացի այդ, խաղողի մեջ պարունակվող շաքարն ու թթուները, ընկնելով կարիեսով վարակված ատամների վրա, առաջ են բերում սուր ցավ և արագացնում են դրանց փչացման պրոցեսը: Այդ պատճառով ատամնաբույժները խորհուրդ են տալիս խաղող ուտելուց հետո անպայման ողողել բերանը:
Եվ չնայած բոլոր օգտակար հատկություններին՝ կան որոշ հիվանդություններ, որոնց դեպքում խորհուրդ է տրվում խուսափել խաղող շատ օգտագործելուց: Այդպիսիք են դիաբետը, ստամոքսի խոցը, քրոնիկ կոլիտները և այլն:
ՈՒՇԱԳՐԱՎ ՓԱՍՏԵՐ
• Ամենամեծ խաղողի թուփը տնկվել է 1842 թվականին Կալիֆոռնիայում: 1900-ի շեմին այն մի քանի տարի շարունակ տալիս էր շուրջ 9 տոննա բերք:
• Խաղողի ամենածանր ողկույզը կշռվել է Սանտյագոյում 1984 թ-ի մայիսին եվ կշռել է 9 կգ 400 գր:
• Բազմաթիվ երկրներում խաղողը համարվում է հաջողության, առողջության, ընտանեկան բարօրության խորհրդանիշը: Օրինակ, Իսպանիայում և Պորտուգալիայում ամանորյա գիշերվա հետ կապված հետաքրքիր սովորույթ կա. ժամացույցի յուրաքանչյուր զարկի հետ միաժամանակ ընտանիքի բոլոր անդամները պետք է ուտեն խաղողի մեկական հատիկ և երազանք պահեն: Տարվա 12-ի ամիսների համար նրանք ուտում են 12 խաղողի հատիկ եվ պահում են 12 երազանք:
ԽԱՂՈՂՈՎ ՊԱՏՐԱՍՏՎՈՂ ԴԻՄԱԿՆԵՐ ԴԵՄՔԻ ՄԱՇԿԻ ՀԱՄԱՐ
1. Խաղողի հատիկները բաժանել 2 մասի և ներսի կողմով շարել դեմքի մաշկի վրա: Դրանցում պարունակվող մրգաթթուն կնպաստի մաշկի մեռուկացած մասի առանձնացմանը և ձեր դեմքը կդարձնի նուրբ ու հարթ:
2. Նուրբ և զգայուն դեմքի մաշկ ունեցողներին խորհուրդ է տրվում կիրառել հետևյալ դիմակը. 1 թեյի գդալ կաթնաշոռը խառնեք 1 թեյի գդալ մեղրի հետ, ավելացրեք 2 թեյի գդալ խաղողահյութ, ստացված զանգվածը հաստ շերտով քսեք դեմքին, 10-15 րոպե թողեք և լվացվեք սառը ջրով:
3. Յուղոտ մաշկ ունեցողները կարող են պատրաստել հետևյալ դիմակը. 1 ձվի սպիտակուցը հարել, ավելացնել 1/2 թեյի գդալ բուսական յուղ և 2 թեյի գդալ խաղողահյութ: Այս դիմակը մաքրում և սպիտակեցնում է դեմքի մաշկը:
4. Կարմիր խաղողի ողկույզը հարեք թթվասերի հետ և պատրաստեք խիտ զանգված: Քսեք դեմքի մաշկին, թողեք 20 րոպե և հեռացրեք սառը կաթով թրջած բամբակե բարձիկով: Նման դիմակը սնուցում, թարմացնում և հարթեցնում է դեմքի մաշկը:
Տարածել... Նմանատիպ նյութերՆոր նյութերՄիացեք մեզ YouTube-ում... 80հզ.+ բաժանորդ
| | ||