19:15 Դու կարող ես դյութիչ լինել | |||
Բոլոր կանայք էլ ցանկանում են գեղեցիկ երևալ և հաճելի տեսք ունենալ: Մենք փորձում ենք հնարավորինս օգտակար լինել այդ հարցում. Չէ՞ որ «Ամեն կին ինքն է իրեն դյութիչ դարձնում»: Ձեր աչքերը պետք է շողան Տանտիկինը հյուրերին պետք է հմայի ոչ միայն ճոխ սեղանով, այլև իր տեսքով: Առաջին հերթին ուշադրություն դարձրեք աչքերին: Հոգնած աչքերը կարող են խամրեցնել ամենագեղեցիկ դեմքն անգամ, իսկ փայլող աչքերն ու պայծառ հայացքը կգեղեցկացնեն նույնիսկ ոչ այնքան բարետես կնոջը: Կոպերի այտուցները կարելի է վերացնել մուգ թեյի թուրմով, բայց եթե տանը մաղադանոս կա, պատրաստեք հետևյալ քսուքները. • 10գ մաղադանոսը մանր կտրտեք և տրորեք 20գ կարագի հետ: Քսեք կոպերին. այտուցները և պարկիկները կանհետանան: • Կաթով պատրաստած կարտոֆիլի պյուրեին մեկ ձվի դեղնուց խառնեք և քսեք կոպերին: Հանգիստ պառկեք 10 րոպե: Մաքրե°ք խոնավ խծուծով կամ լվացվեք: Երիտասարդացնող լոգանքներ Լոգանքներն ունեն կազդուրիչ և երիտասարդացնող հատկություն: Այս լոգանքը պետք է ընդունել օրումեջ: 1 լիտր կաթը լավ տաքացրեք, երկրորդ ամանի մեջ, գոլորշու վրա մեկ բաժակ մեղր հալեցրեք: Մեղրը լուծեք կաթի մեջ, ավելացրե°ք ձիթապտղի 2 ճաշի գդալ յուղ և խառնուրդը լցրեք ջրի մեջ: Այս խառնուրդով լոգանքից հետո մաշկը դառնում է հարթ ու նուրբ: Լվացվեք սառույցով Առավոտյան լվացվելու փոխարեն դեմքը շփեք սառույցի կտորով: Այն պետք է պատրաստել լորենու, եղեսպակի կամ երիցուկի ծաղիկների թուրմով: Սառույցով շփելուց հետո սրբիչի ծայրը թրջե°ք և թեթևակի մերսեք դեմքը, որից հետո համապատասխան քսուք քսեք: Շուրթերին մի կաթիլ մեղր քսեք և թողեք, մինչև լրիվ ներծծվի: Սնուցող քսուք ինքնուրույն էլ կարող եք պատրաստել, օրինակ՝ գազարից: • 2 գազարը մանր քերիչով քերեք, ավելացրեք կիտրոնի 5 կաթիլ թարմ հյութ և բուսայուղ: Լավ հարե°ք, մինչև որ միատարր զանգված դառնա: Քսեք դեմքին , թողեք 15-20 րոպե: • 2 գազարը քերեք, խառնե°ք կարտոֆիլի 2 ճաշի գդալ ալյուր և 1 ձվի դեղնուց: • Այս դիմակները հարթեցնում են կնճիռները, լավացնում են մաշկի գույնը: Ամենալավ զարդարանքը Ֆրանսիացիները սիրում են կատակել. «Մազերի վիճակից կարելի է հասկանալ՝ արդյոք երջանիկ է մարդը ընտանեկան կյանքում, թե՞ ոչ»: Որպեսզի ձեր մազերը փայլեն և հմայեն, պետք է դրանք սնուցեք: • Կաղնու 3 ճաշի գդալ կեղևը 15 րոպե եռացրեք 1 լիտր ջրում: Այս թուրմով կարելի է մազերը լվանալ, կամ մազերին թրջոց դնել: Կրկնեք յուրաքանչյուր 3 օրը մեկ: • Մազերը ամրացնելու և աճը խթանելու համար օգտակար է հազրեվարդը: 2 թեյի գդալ հազրեվարդի վրա 300մլ եռջուր լցրեք, թրմեք, քամեք և դրանով մերսեք գլխամաշկը: Ձեր դեմքը պետք է փայլի Ձեզ անհրաժեշտ է 2 սրբիչ: Դեմքը լավ մաքրե'ք, հաստ շերտով յուղոտ քսուք քսեք, առաջին սրբիչը թրջեք եռման ջրով և փաթաթեք դեմքին, թողեք այնքան, մինչև սառչի: Նորից հաստ շերտով քսուքը քսե'ք, երկրորդ սրբիչը թրջեք սառը ջրով և փաթաթե'ք դեմքին: Կրկնե'ք 5-6 անգամ: Սա կօգնի կարգի բերելու ձեր դեմքը. կլավանա գույնը, մաշկը կնրբանա: Բայց հիշեք, որ արդյունքը կպահպանվի միայն մեկ օր: Դուք եք կերտում ձեր գեղեցկությունը Դուք կարող եք ձեր սիրելիի համար լինել ամենահմայիչն ու ամենաախորժելին: Կանանցից յուրաքանչյուրը յուրովի է գեղեցիկ: Կարևոր չեն ո'չ դիմագծերը, ո'չ էլ կազմվածքը, այլ այն գրավչությունը, որը բնորոշ է միմիայն նրան: Եթե դուք ձեզ դուր գաք, ձեր շրջապատն էլ դա կընդունի: Պետք է ձեզ վարժեցնեք այն մտքին, որ հմայիչ եք: Պետք է միայն փոխեք ձեր մտածելակերպը, ձեր պահվածքը. դուք ի վիճակի եք փոխելու ձեր արտաքինը: Միայն պետք է ցանկանաք: Կանգնեք հայելու առջև և հիացեք ձեզնով` ինքներդ ձեզ հաճոյախոսություններ նվիրելով. սա հոգեբանական մեթոդ է, որի շնորհիվ ինքնավստահություն ձեռք կբերեք: Ահա մի քանի արտահայտություններ, որոնք կօգնեն ձեզ. • Ես ընդունում և սիրում եմ ինձ: • Ես հավատում եմ ինձ: • Ես հրաշալի տեսք ունեմ: Ես լույս եմ և ուրախություն: • Իմ աչքերը փայլում են ուրախության և սիրո կրակով: • Աշխարհը գեղեցիկ է, առատաձեռն և բարի իմ նկատմամբ: • Ես ընտրում եմ գեղեցկությունը և հաջողությունը: • Ես եմ իմ կյանքի ուղին կերտում: Կարող եք սեփական արտահայտությունները հորինել: Շատ կարճ ժամանակ անց զարմանալի փոփոխությունների ականատեսը կլինեք: Ձեր հմայիչ արտաքինը և հոգու գեղեցկությունը, հավատացեք, աննկատ չեն մնա: Տարածել... Նմանատիպ նյութերՆոր նյութերՄիացեք մեզ YouTube-ում... 80հզ.+ բաժանորդ
| |