Կյանքը կինո չէ, և լավն էլ, թերևս, դա է: Անփոխադարձ սեր, արյան վրեժ, ծննդաբերության ժամանակ շփոթած երեխաներ, 20 տարի անց ծնողներին գտած զավակներ… Ինչ խոսք, նման իրավիճակների նախընտրելի է ականատես լինել միայն ֆիլմերում: Բայց կան պահեր, որոնք խիստ գրավիչ կարողանում են պատկերել կինոարտադրողները: Օրինակ` կինն ասում է. «Սիրելիս, մենք երեխա ենք ունենալու»: Տղան` արցունքներն աչքերին, գրկում է նրան և ասում, թե ինչքան երջանիկ է: Եվ ապա տեսախցիկը թեքվում է` ցուցադրելով անեզր երկինքը` որպես լուսավոր ապագայի խորհրդանիշ:
 «Ես շատ հուզվում էի, անվերջ մտածում` ինչպես ասել լուրը, ինչպես դա կընդունի Արմենը: Պատրաստեցի առանձնահատուկ ընթրիք, գնեցի շատ փոքրիկ խմորեղեններ` դնելով սեղանին: Բայց ամեն ինչ տեղի չունեցավ այնպես սրտահույզ ու ռոմանտիկ, ինչպես սպասում էի: «Լու՞րջ ես ասում»,- հարցրեց նա: Եվ ապա ավելացրեց. «Իսկ ինչու՞ ես այդպես վստահ»: Մի խոսքով` ամեն ինչ փչացրեց: Իսկ ես կցանկանայի այդ օրը հիշել ամբողջ կյանքում»,- պատմում է Աստղիկը: Բազմաթիվ ապագա մայրեր խոստովանում են, որ կցանկանային ամուսնու կողմից այլ վերաբերմունք, այլ պահվածք նկատել իրենց և ծնվելիք բալիկի նկատմամբ: Եվ ընդ որում` այնպիսի ընտանիքների կանայք, որոնց դեպքում երեխայի ծնունդն անակնկալ չէր, ինչը կփոխեր բոլոր ծրագրերը, այլ` երկար սպասված, ցանկալի իրադարձություն: Հարց է ծագում` ինչու՞ է այդ կարևոր իրադարձությունը, որ պիտի միավորեր, հակառակը` պատնեշ առաջացնում ամուսինների միջև: Ո՞րն է խնդիրը: Կանա՞յք են հղի ժամանակ ավելի նեղացկոտ ու պահանջկոտ դառնում, թե՞ տղամարդիկ են չափազանց եսասեր: Եվ ով ու՞մ պետք է ընդառաջ գնա: Ուրախություն դեմքին կարծես այդքան էլ չկա: Տղամարդիկ ավելի զուսպ են զգացմունքների հարցում և այլ կերպ են դրանք արտահայտում: Հիշե'ք, թե ինչպես է ձեր ամուսինը (կամ ձեզ ծանոթ այլ տղամարդիկ) վերաբերմունք ցույց տալիս որևէ ուրախալի իրադարձության: Ամենայն հավանաականությամբ ոչ այսպես. «Վա՜յ, ինչ հրաշալի է: Թանկագինս, ես այնքան երջանիկ եմ (համբույրներ)»: Հավանաբար չի նետվում ձեզ գրկելու, վեր-վեր չի թռչում հայելու առաջ և չի շտապում զանգելու ընկերներին` լուրը շուտափույթ հաղորդելու համար: Բոլոր բառերի համար, որոնցով կանայք արտահայտում են իրենց դրական հույզերը, տղամարդիկ ունեն մեկ հոմանիշ` «Նորմալ է»: Նույն «Նորմալ է»-ն այլ երանգով նշանակում է «Դե, ադյքան էլ նորմալ չէ», կամ «Միայն դա էր պակասում»: Եվ միայն ձեր կանացի ինտուիցիան կօգնի հասկանալ նրա իրական վերաբերմունքը: Իհարկե, ոչ բոլոր տղամարդիկ են միանման զուսպ զգացմունքներն արտահայտելիս: Դա կապված է նաև մարդու խառնվածքի ու խանդավառության աստիճանի հետ և` անգամ նրա հետ, թե ինչպես են դաստիարակել մանուկ ժամանակ: Բայց միայն նրա խոսքերի միջոցով դատել, թե ինչ է իրականում զգում տղամարդը, շատ դժվար է, համենայն դեպս` կնոջ համար: Ինչ վերաբերում է դեմքի արտահայտությանը, ապա զգացմունքների մեծամասնությունը (վախ, զզվանք, ուրախություն, զայրույթ, զարմանք) տղամարդկանց դեպքում հիմնականում չի արտահայտվում դիմախաղով: Եվ ինչպե՞ս վարվել:  Կա մի արտահայտություն` «Մենք կարծես տարբեր լեզուներով ենք խոսում»: Եթե խոսքը կանանց և տղամարդկանց է վերաբերում, ապա դա մասամբ համապատասխանում է: Միևնույն բառերն ու արտահայտությունները տղամարդն ու կինը տարբեր կերպ են ընկալում, նույն մտքերն արտահայտում բոլորովին այլ կերպ: Տղամարդու խոսքն ավելի կարճ է և ուղղակի: Նրանք ավելի շատ օգտագործում են բայեր և գոյականներ ու նախընտրում են մտորել լուռ` խոսքով արտահայտելով միայն իրենց մտորումների վերջնական արդյունքը: Կանայք երբեմն մտածում են բարձրաձայն, օգտագործում են շատ որոշիչներ, ի վիճակի են լսելու զրուցակցին և շատ նրբազգաց են զրուցակցի ձայնի երանգի փոփոխություններին: Տղամարդը հնարավոր է` չգուշակի էլ, որ իր խոսքերում ինչ-որ բան վիրավորեց կնոջը:Ելենան պատմում է. «Մենք նպատակ ունեինք երեխա ունենալ», և ամեն ինչ հիանալի էր: Մի օր այնպես էր ստացվել, որ տանը հյուրեր ունեինք: Տղամարդիկ մեքենաների թեման էին քննարկում, և ամուսինս, պատասխանելով հարցին, թե ինչու մենք մեքենա չենք գնում,ասաց. «Դե, եթե երեխայի հարցը չլիներ, կարելի էր…»: Ես իմ ականջներին չէի հավատում. ինչպե՞ս կարելի էր նման բան ասել: Բնականաբար մենք վիճեցինք: Մի քանի օր իրար հետ չէինք խոսում, չնայած նա պնդում էր, որ բոլորովին վատ իմաստով չի ասել, որ ինքը նույնպես ցանկանում է երեխա ունենալ և ընդամենը ցանկանում էր ասել, որ հիմա նոր գնումների ժամանակը չէ իրենց համար: Բայց ամենասարսափելին այն է, որ երբ ծնվեց երեխան, նա նույն միտքն արտահայտեց այս անգամ համատեղ հանգիստ անցկացնելու վերաբերյալ: Այս անգամ ես չսկսեցի վիճել: Մնացած բոլոր հարցերում նա կատարյալ հայր է: Նա այնքան հաճույքով է խաղում բալիկի հետ, նույնիսկ պառկեցնում ու հեքիաթներ է պատմում: Թերևս կասեի, որ նա լավագույն հայրիկն է, եթե հաշվի չառնենք նրա արտահայտությունները»: Պետք է փաստել, որ այն, ինչ կնոջ կողմից ընկալվում է որպես ափսոսանք, կարող է լինել ընդամենը փաստի արձանագրում: Դա պետք է հասկանալ, բայց պարտադիր չէ դրա հետ համակերպվել: Փոխըմբռնումը փոխադարձ գործընթաց է, և տղամարդը պետք է իմանա, թե ինչն է կնոջը դուր գալիս և ինչը` ոչ: Կանանց բնորոշ հնարքներն այս դեպքում (վիրավորանք, վեճ) ի վիճակի են տղամարդուն հասկացնելու ձեր ապրումները: Իսկ եթե տղամարդը պատրաստ չէ հայրանալու… Իսկ ինչպես վարվել, թե ապագա հայրիկն իսկապես այդքան էլ ուրախ չէ կատարվող իրադարձությունների համար: Սա նույնպես հնարավոր է, և այս դեպքում իրավիճակի փոփոխության համար անհրաժեշտ է ձեր ողջ համբերությունը, ըմբռնումն ու կանացի իմաստնությունը: «Մենք շատ ներդաշնակ հարաբերություններ ունեինք, մինչև որ ԴԱ պատահեց: Իսկ հիմա ինձ մոտ զգացողություն կա, որ ես նրան պետք էի միայն նրա համար, որ երեխա ունենար: Մենք երեխայից բացի ուրիշ ոչնչի մասին չենք զրուցում, ոչ մի տեղ չենք գնում բացի մանկական խանութներից, նա ժամերով հեռախոսով խոսում է իր ծանոթ գինեկոլոգի հետ և կարդում է ամսագրեր երեխաների մասին: Նրա տրամադրությունն այնքան արագ է փոխվում, որ ես չեմ էլ հասցնում համապատասխան վերաբերմունք ձևավորել, և այն ամենն, ինչ անում եմ, նրան գրգռում է: Իսկապես, մեր ամբողջ կյանքը գլխովին շրջվել է: Մենք երբեք այնքան չէինք վիճել, ինչքան` հիմա: Մեկ ասում է, որ լավ կլինի առանձնանանք, մեկ մեղադրում, որ իրեն քիչ եմ ուշադրություն դարձնում: Անկեղծ ասած` երբեմն ցանկություն առաջանում է նրանից առանձնանալ առժամանակ: Չեմ պատկերացնում, թե ինչ կասեն բարեկամները, մանավանդ նրա մայրը, որն, ի դեպ, գրեթե ամբողջ օրը մեզ հետ է…»,- անկեղծանում է Հակոբը: Չնայած նրան, որ ամբողջ բեռը (բոլոր իմաստներով) կնոջ ուսերին է, հայրերը հղիությունը տանում են ոչ թեթև, եթե ոչ ավելի ծանր: Հոգեբանական տարբերություններից մեկը կնոջ և տղամարդու միջև այն է, որ կնոջ համար ավելի է հեշտ է համակերպվել ծնողի դերին, քան տղամարդուն: 
Տարածել... Նմանատիպ նյութերՆոր նյութերՄիացեք մեզ YouTube-ում... 80հզ.+ բաժանորդ
| Դիտումներ: 4490 |
| | |