«Ես չեմ սպասում մինչև գներն առավելագույնի հասնեն, քանզի գներն անսպասելի ընկնելու սովորություն էլ ունեն.
ես քայլ եմ անում այն ժամանակ, երբ շահույթն արդարացված է»:

Քըրք Քըրքորյան

Բարի ժպիտով հայ գործարարը (իսկական անունը` Գրիգոր Ահարոնի Գրիգորյան) ծնվել է 1917 թվականին ԱՄՆ Ֆրեզնո քաղաքում` 1890 թվականին Խարբերդից ջարդերի պատճառով Միացյալ Նահանգներ գաղթած Գրիգորյանների ընտանիքում: Հայրը՝ Ահարոնը, իր բազմանդամ ընտանիքը պահում էր միրգ վաճառելու միջոցով: Համաձայն կենսագիրների` ծնողները` Ահարոնն ու Լիլյան, իրենց չորս զավակներին հայեցի դաստիարակություն էին տալիս, ասես դեռևս բնակվում էին Արևմտյան Հայաստանում և հայ հասարակության մեջ: «Մեր ընտանիքում խոսում էին միմիայն հայերեն: Անգլերեն ես սովորել եմ բակում ընկերներիս հետ խաղալիս»,- իր հարցազրույցներում բազմիցս ասել է Քըրքորյանը:

Գրիգորը մանկության տարիներից գումար է աշխատել, թերթ է վաճառել, զբաղվել մեքենաների լվացմամբ ու վերանորոգմամբ: Այնուհետև նա եղել է բռնցքամարտիկ, անգամ` սիրողական բռնցքամարտի չեմպիոն, ինչպես նաև ռազմաօդային ուժերի օդաչու, մասնակցել Երկրորդ Համաշխարհային պատերազմին, զբաղվել է օդանավերի բաժնեթղթերի առևտրով, ապա` կինոարտադրությամբ, կառուցել է Լաս Վեգասի «Ֆլամենգո», «Էմ Ջի Գրանդ» և այլ հյուրանոցներ` այդպես քայլ առ քայլ սեփական ուժերով կուտակել է իր ունեցվածքը: Արագ թանկացող Լաս Վեգասի հողերը Քըրքորյանը սկսեց գնել 60-ականներին: Սթրիփ շրջանի 8 հեկտարները նա ձեռք բերեց ընդամենը 960.000 դոլարով, քանի որ այդ շրջանը հեռու էր կենտրոնական հյուրանոցներից և խաղատներից, սակայն մի քանի տարի անց քաղաքն ընդլայնվեց, ու միայն հողերը վարձակալության հանձնելով` Քըրքորյանին հաջողվեց ընդամենը վեց տարում ունեցալ 4 մլն դոլարի շահույթ: Իր Trasinda Corporation ընկերությունը Քըրքորյանն անվանել է իր դուստրերի՝ Թրեյսիի ու Լինդայի պատվին: Forbes հեղինակավոր ամսագիրն ընդգրկել է նրան աշխարհի ամենահարուստ մարդկանց ցուցակում: Այնուհանդերձ, Քըրքորյանը շատ համեստ ու բարեսիրտ անձ է. ի պատասխան լրագրողների հարցերին` նա սովորաբար ասում է. «Իմ կյանքի մասին ավելի լավ իմ գործերն են պատմում»: Քըրք Քըրքորյանը հազվադեպ է իր ընկերությունների տնօրենների խորհրդի քննարկումներում հայտնվում, իսկ հասարակության առջև գրեթե երբեք ելույթներ չի ունենում: Բարձրաշխարհիկ երեկույթներին մասնակցելու փոխարեն` նա նախընտրում է իր ընտանիքի անդամների, մտերիմների ու հին ընկերների հետ շփվել:

Հարկ է խոսել նաև իր հայրենիքին ցուցաբերած զգալի օգնության մասին. Սպիտակի երկրաշարժից հետո և ՀՀ շրջափակման ու տնտեսական ճգնաժամի տարիներին Հայաստան Համահայկական Հիմնադրամի տարբեր ծրագրերին նվիրաբերել է ավելի քան 20 մլն դոլար, իսկ առաջին խոշոր հատկացումը կատարել է 1993թ.՝ եռապատկելով «Ձմեռ 1993-1994» վառելանյութի ու ջեռուցման ծրագրի համար Սփյուռքի հավաքած 7 մլն դոլարը։ 1996թ. նա կրկնապատկել է Լոս Անջելեսի հեռուստամարաթոնում հավաքված գումարը՝ Գորիս-Ստեփանակերտ ավտոճանապարհի շինարարությանը հատկացնելով գրեթե 4 մլն. դոլար: 2001 թվականից Քըրք Քըրքորյաննրա «Լինս» հիմնադրամը 200 մլն դոլարի արժողության ծրագրեր է իրականացրել ՀՀ-ում` ավտոճանապարհների վերակառուցման, մշակութային զանազան հաստատությունների նորոգման, Աղետի գոտու վերականգնման ուղղությամբ։
Վերջերս Քըրքորյանին մեղադրանքներ է ներկայացրել վրացական ընդդիմությունը` ասելով` իբր «Սաակաշվիլիին մեզ ուղարկել է ոչ թե Աստված, այլ` Քըրք Քըրքորյանը»: Ինչպես պնդում է ընդդիմադիր Շատբերաշվիլին, Սահակաշվիլին կատարում է Քըրքորյանի հրահանգները` միաժամանակ հետևելով ԱՄՆ-ում հայկական լոբբիի ցուցումներին:

Լինելով մեծահարուստ և ամեն ինչի հասնելով միմիայն սեփական ունակությունների ու կամքի շնորհիվ` Քըրք Քըրքորյանը երբեք չի ժխտել իր` հայ լինելու հանգամանքը` ամենօրհասական պահերին կանգնելով իր ժողովրդի կողքին,- հաղորդում է MaryLove-ը:

Նմանատիպ նյութեր

• Մայքլ Բլումբերգի բիզնեսի կանոնները
• «Яндекс». Նորարարական ընկերության հաջողության պատմությունը (VIDEO)
• Մի բրենդի պատմություն. Chanel
• Մարկ Ցուկերբերգ. Ֆեյսբուքի իրական դեմքը / Mark Zuckerberg. The real face behind facebook (VIDEO)
• Որո՞նք են միլիարդատերերի նախընտրած երկրները

Նոր նյութեր

Միացեք մեզ YouTube-ում... 80հզ.+ բաժանորդ