kiss.am

Սիլվա Կապուտիկյան

ՏԱՐԻՆԵՐ ՀԵՏՈ

Ես չեմ ուզում քեզ հանդիպել,
Քեզ չեմ ուզում տեսնել անգամ,
Շտապում եմ ճամփաս թեքել,
Երբ իմ դեմ ես ելնում հանկարծ:

Ես ուզում եմ, ի՜մ անձկալի,
Իմ աչքի դեմ, իմ խորքերում
Այնպե՛ս մնաս, ինչպես այն հին,
Ձմեռայի՜ն այն գիշերում:

Այնպես սիրո՜ղ, այնպես նկո՜ւն,
Աչքերիդ մեջ` կապույտ ու շող,
Ու փաթիլի նման քնքուշ,
Ու կրակի նման այրվող:

Երբ հալվո՜ւմ էր մի ողջ ձմեռ
Տաք շշունջից քո շուրթերի.
Այս լուսնի տակ չասվա՜ծ խոսքեր`
Անկրկնելի՜, անկրկնելի՜:

Երբ թվում էր` կարող էիր
Մոռանալ քե՜զ, անուն ու փառք,
Աշխարհը մե՜ծ, աշխարհն անծի՜ր
Փռել փոքրիկ իմ ոտքի տակ:

Ոչ, չեմ ուզում ես քեզ տեսնել
Այդպես խաղա՜ղ, այդպես հանգա՜ծ,
Շտապում եմ ճամփաս թեքել,
Երբ իմ դեմ ես ելնում հանկարծ...

HD որակով դիտել այստեղ:

Հատված Հայկ Բլբուլյանի «Գիշերային կյանք» ռադիոծրագրի ուղիղ եթերից:

Նմանատիպ նյութեր

• ՀՈՎՀԱՆՆԵՍ ԹՈՒՄԱՆՅԱՆ «ԱՆՈՒՇ» Կարդում է Սոս Սարգսյանը
• Վահան Տերյան «Մթնշաղ» (կարդում է Հայկ Բլբուլյանը)
• Վահան Տերյանի բոլոր բանաստեղծությունները՝ աուդիոտարբերակով
• Հայկ Բլբուլյանի ռադիոշարքերը (Audio)
• Գրիգոր նարեկացի. «Մատյան ողբերգության». Կարդում է Սոս Սարգսյանը

Նոր նյութեր

Միացեք մեզ YouTube-ում... 80հզ.+ բաժանորդ