kiss.am

Մարդու արյան խումբը պայմանավորված չէ ռասայական, տարիքային և սեռային առանձնահատկություններով, այն գենետիկորեն ժառանգվում է ծնողներից ու մնում անփոփոխ ողջ կյանքի ընթացքում: 1900-ական թվականներին եվրոպական որոշ եկրներում, ինչպես նաև ճապոնիայում, լայն տարածում գտավ մի տեսություն՝ համաձայն որի մարդու բնավորության խառնվածքային առանձնահատկությունները պայմանավորված են արյան խմբով:

Այս տեսության հիմնադիրներից էր ճապոնացի գիտնական Տաշիտակա Նոմին, ում ամենահայտնի աշխատությունը՝ «Կեցու էկի գատտա» («Դու քո արյան խումբն ես»), վաճառվեց ճապոնիայում ավելի քան 5 միլիոն օրինակով: Այս գրքում ներկայացված էին մարդու արյան խմբի և հոգեբանական առանձնահատկությունների փոխպայմանավորվածությունը, արյան տարբեր խմբերի անձանց համատեղելիությունը, ինչպես նաև արյան խմբի առանձնահատկություններով պայմանավորված հոգեբանական խնդիրների կարգավորման մեթոդները: ճապոնիայում այս տեսությունը սկսեցին կիրառել կադրերի ընտրության, մասնագիտական խմբերի ձևավորման, ծանոթության ու ամուսնական կենտրոնների աշխատանքում: Այդ գիտնականների կարծիքով՝ կնոջ ու տղամարդու փոխհարաբերություններում, բացի հոգեբանական համատեղելիության հիմնախնդիրներից, գոյություն ունեն նաև ֆիզիոլոգիական համատեղելիության խնդիրներ, որոնցից ամենակարևորն արյան խումբն է:

Ստորև մենք կներկայացնենք տարբեր արյան խումբ ունեցող անձանց համատեղելիությունը և նրանց համատեղ կյանքի առանձնահատկությունները, բայց մինչև այդ նշենք, որ ինչպես մարդկանց դասակարգելու ցանկացած տարբերակ, այնպես էլ ըստ արյան խմբի մարդկանց դասակարգելու փորձերը չի կարելի ընդունել որպես բացարձակ ճշմարտություն և կյանքում առաջնորդվել միայն այս տեսությամբ:

Արյան առաջին խումբ

Այս անձանց համար կարևոր է միշտ և ամեն ինչում առաջինը լինելը: Նրանք նպատակասլաց են, ինքնավստահ, դիմացկուն, իսկ առաջնորդ (լիդեր) լինելու մոլուցքը նրանց արյան մեջ է: Այս խմբի ներկայացուցիչները միևնույն ժամանակ եսասեր են, երբեմն՝ ինքնահավան:

Արյան առաջին խումբ ունեցող տղամարդիկ

Այս տղամարդկանց գրավելու միակ տարբերակը... մերժելն է: Նրանք որսորդներ են և սիրում են որս անել: Եվ եթե չեք ուզում նրա ցուցակում լինել հերթականը, ոչ մի դեպքում միանգամից ցույց մի՛ տվեք ձեր համակրանքը: Չնայած, նշենք, որ այս տղամարդկանց հանդեպ անտարբեր մնալն այդքան էլ հեշտ չէ: Մուկն ու կատու խաղալն այս տղամարդուն գերելու ամենահեշտ տարբերակն է, բայց չմոռանանք նշել, որ այս տղամարդիկ ամուսնությունից հետո էլ հաճախ սիրում են «որսի դուրս գալ»:
Այս ինքնավստահ ու նպատակասլաց անհատին պետք չեն մրցակիցներ, ուստի նրանք դժվար համատեղելի են նույն խմբի կանանց հետ: Այս համատեղելիությունը հնարավոր է միայն այն դեպքում, երբ կինն առաջին իսկ օրվանից ցույց տա, որ ինքը չէ գլխավորն ընտանիքում: Այ երկրորդ խումբ ունեցող կանայք կգերեն այս տղամարդկանց իրենց անմատչելիությամբ. իսկ հետագայում կպահեն իրենց հավատարմությամբ ու խոհեմությամբ, առանց ինչի այս տղամարդկանց կյանքը թերի կլինի: Արյան երրորդ խումբ ունեցող կանայք այս տարբերակում հարմար են կարճատև ժամանցի, արձակուրդային սիրավեպի համար: Ամուսնական հարաբերություններում արյան երրորդ խմբի կանայք ստիպված կլինեն հարմարվել առաջին խումբ ունեցող եսասերի պահանջներին ու մոռանալ թեթևամտության մասին: Արյան չորրորդ խումբ ունեցող լուրջ ու խելացի կանայք հեշտությամբ լեզու կգտնեն այս հերոսի հետ:
Կարևորն այս տղամարդուն մշտապես ուշադրության կենտրոնում պահելն է:

Արյան առաջին խումբ ունեցող կանայք

Այս կանայք գեղեցիկ են, խելացի, գիտեն իրենց արժեքն ու կարողանում են համապատասխան ձևով ներկայացնել իրենց: Նրանք զգացմունքային են, կրքոտ, սիրում են փորձություններ, միևնույն ժամանակ իշխող են ու խանդոտ: Բռնելով հերթական որսին՝ նրանք ոչ մի կերպ չեն թողնի նրան, քանի դեռ չեն ձանձրացել: Այս կանանց գրավելու համար անհրաժեշտ է մեծ երևակայություն, համարձակություն ու ինքնավստահություն:
Այս խմբի ուժեղ ու նպատակասլաց կանանց համար նույնախումբ տղամարդիկ վտանգավոր են. այս միությունն ավելի նման կլինի արտակարգ իրավիճակի, քան սիրո:
Արյան երկրորդ խումբ ունեցող գործնական ու կայուն տղամարդը հիանալի տարբերակ է կանանց համար: Ամուսնությունն այստեղ կայուն ու երջանիկ կլինի: Երրորդ խմբի ներկայացուցիչները այնքան էլ կայուն ու հուսալի չեն, չնայած հաճախ հեշտությամբ կարող են գրավել առաջին խմբի կանանց: Չորրորդ խմբի տղամարդու յուրօրինակությունն ու մեծ ռոմանտիկան ավելի շուտ կձանձրացնեն, քան կոգևորեն այս կանանց:

Արյան երկրորդ խումբ

Այս խմբի ներկայացուցիչները հանգիստ են, հավասարակշռված, համբերատար: Նրանք ընկերասեր են, կարգապահ, հեշտությամբ հարմարվում են ցանկացած միջավայրի: «Ինչ ցանես, այն էլ կհնձես»,- սա է այս անձանց կարգախոսը:

Արյան երկրորդ խումբ ունեցող տղամարդիկ

Սիրային հարցերում նրանք ամաչկոտ են ու ոչ ինքնավստահ: Նրանց բավականին երկար ժամանակ է հարկավոր իրենց զգացմունքներն արտահայտելու համար: Նրանք ուշադրութամբ զննում են իրենց ընտրյալին, հետևում յուրաքանչյուր արտահայտությանը և սպասում, մինչև առաջին քայլն անելու պահը հասունանա: Այս տղամարդուն շատ կհավանեին ընտրյալի ազգականները, մասնավորապես տատիկներն ու ավագ մորաքույրները, ովքեր ընտանեկան հարաբերություններում առավել կարևորում են կայունությունն ու հարգանքը: Իսկ ռոմանտիկ երազներով ու երևակայություններով լի երիտասարդ գեղեցկուհուն այս տղամարդը կարող է ձանձրալի թվալ: Եթե ձեզ դուր է գալիս արյան երկրորդ խումբ ունեցող տղամարդ, ապա ձեր գլխավոր խաղաքարտը պիտի լինի հոգեկան կապը: Ցույց տվեք, որ դուք լավ եք հասկանում նրան և պատրաստ եք կիսել նրա հետաքրքրությունները: Մի՛ փորձեք արագացնել իրադարձությունները, համբերատար սպասեք, մինչև ձեր ընտրյալն ինքը հասկանա, որ պահն արդեն հասունացել է, այլապես կարող եք վախեցնել նրան:
Առաջին խմբի ուժեղ ու ռոմանտիկ կանայք կարող են գրավել այս տղամարդկանց հատկապես երիտասարդ տարիներին: Տարիքի հետ զուգահեռ երկրորդ խմբի տղամարդուն գրավելու շանսը առաջին խմբի կնոջ մոտ նվազում է: Նույն խմբի կանայք այս տղամարդկանց շատ սառն ու հաշվենկատ են թվում: Նման միությունը ներդաշնակ ու կայուն դարձնելու համար կնոջից կպահանջվի հնարամտություն ու համբերատարություն: Իսկ արյան երրորդ խումբ ունեցող կանայք ավելի լավ կարող են բավարարել այս տղամարդկանց պահանջները: Նրանք ներփակված ու չափազանց զգուշավոր այս տղամարդուն կարող են տալ ջերմություն ու անմիջականություն, որի կարիքը նա շատ է զգում: Հաճախ այս տղամարդկանց գերում են նաև չորրորդ խմբի ներկայացուցիչ կանայք: Նրանք լավ համատեղելի են և՛ հուզական, և՛ սեռական առումով, բայց այս միությունը ամուսնությամբ հազվադեպ է ավարտվում՝ չնայած կարող է մնայուն հետք թողնել:

Արյան երկրորդ խումբ ունեցող կանայք

Այս կանայք հավասարակշռված են, խելացի, բարեկիրթ, և կարող է տպավորություն ստեղծվել, որ նրանք մեծացել են հատուկ օրիորդաց դպրոցներում: Նրանք ամաչկոտ են և հազվադեպ են համարձակվում առաջին քայլն անել: Նրանք հավատարիմ են, համբերատար ու կարողանում են խուսափել վեճերից: Այս կանայք լավ մայրիկներ են, պարտաճանաչ աշխատակիցներ, հավատարիմ կին: Նրանց գրավելու համար ձեզ անհրաժեշտ է նրբանկատություն, համբերատարություն ու հավատարմություն: Այս խմբի ներայացուցիչները բավականին դժվար են տանում դավաճանությունը և երբեք չեն հարմարվում այդ մտքի հետ: Ձեր առաջին իսկ կասկածելի արարքը կստիպի նրան հիասթափվել ու հրաժարվել ձեզանից:
Ինքնավստահ ու համարձակ առաջին խմբի ներկայացուցչի կողքին այս կինն իրեն կարող է պաշտպանված ու ապահով զգալ: Նույնախումբ տղամարդու հետ ձեզ կարող է ձանձրացնել միօրինակությունն ու նմանությունը: Բայց, եթե ամուսինը տարիքով ավելի մեծ է, ամուսնությունը կլինի կայուն ու երջանիկ: Երրորդ խմբի ներկայացուցչի հետ բուռն ու կրքոտ սիրավեպը դուք երկար կհիշեք: Բայց անվերջ զվարճանքներ փնտրող տղամարդու կին դառնալու հեռանկարը դժվար թե հետաքրքրի այս խմբի ներկայացուցիչ իրատես ու ռեալիստ գեղեցկուհուն: Չորրորդ խմբի ռոմանտիկ տղամարդը կնվիրի նրան այդքան անհրաժեշտ սիրային ջերմությունն ու վեհությունը, բայց այս տարբերակի համար ճիշտ կլիներ ասել, որ սիրուց մինչև ատելություն մի քայլ է:

Արյան երրորդ խումբ

Այս խմբի ներկայացուցիչները հիանալի հարմարվում են ցանկացած միջավայրի և իրավիճակի: Առանձնանում են անհատական մտածելակերպով, յուրօրինակությամբ ու խորամանկությամբ: Նրանք չեն վախենում միայնությունից: Չեն սիրում ենթարկվել, բայց չեն սիրում նաև իշխել: Ցանկացած իրավիճակում նրանք կարող են գտնել իրենց շահը և օգուտ քաղել:

Արյան երրորդ խումբ ունեցող տղամարդիկ

Այս տղամարդիկ իսկական դոն ժուաններ են և հեշտությամբ գրավում են ցանկացած կնոջ, բայց խուսափում են պատասխանատվությունից: Այս խմբի տղամարդը մերժումները ծանր չի տանում և չի ֆիքսվում դրա վրա: Եթե ուզում եք գայթակղել այս տղամարդուն, ապա ուշադրությամբ լսեք նրա յուրաքանչյուր խոսք, մտապահեք յուրաքանչյուր ժեստ և յուրաքանչյուր հարմար առիթի դեպքում հիացեք նրա յուրօրինակությամբ: Առաջին խմբի կանանց այս տղամարդը գերում ու գայթակղում է իր յուրահատկությամբ, և նրանք պատրաստ են զիջումների գնալ հանուն նման յուրօրինակ ամուսնու: Երկրորդ խմբի կանայք այս տղամարդկանց գրավում են իրենց ռեալիստությամբ ու համակարգվածությամբ: Նրանք այս տղամարդու կյանքում ներդաշնակություն, կարգուկանոն կմտցնեն: Նույն խմբի անձանց հետ կարելի է ակնկալել բուռն հույզեր ու կիրք, հիանալի հասկանում են իրար ու մեծ բավականություն ստանում սիրուց: Չորրորդ խմբի ի բնե իդեալիստ կանայք նույնպես մեծ շանսեր ունեն այս խմբի տղամարդուն գրավելու: Ամուսնանալու դեպքում նրանցից կպահանջվի փոքր-ինչ համակարգվածություն ու զգուշություն:

Արյան երրորդ խումբ ունեցող կանայք

Այս կանանց համար սիրախաղը հիանալի զբաղմունք է: Նա անում է այն, ինչ իրեն հետաքրքիր է, ինչ իրեն հաճելի է՝ առանց հետագայի մասին մտածելու: Այս կանայք սովորաբար շատ համակրելի են ու հեշտությամբ կարողանում են գերել յուրաքանչյուր տղամարդու, բայց հազվադեպ են լրջորեն սիրահարվում ու նվիրվում մեկ տղամարդու: Այս կնոջը գրավելու համար դուք անվերջ ստիպված կլինեք նոր ու հետաքրքիր անակնկալներ հորինել, բավարարել նրա ցանկությունները՝ կապված հագուստի, զարդեղենի և զվարճանքի վայրերի հետ:
Առաջին խմբի տղամարդիկ հաճախ մեծ հետաքրքրություն ու համակրանք են դրսևորում երրորդ խմբի կանանց նկատմամբ, բայց ոչ թե զգացմունքներից դրդված, այլ սեփական կարևորությունը ընդգծելու համար: Երկրորդ խմբի հետ հարաբերություններն ավելի պարզունակ ու ձանձրալի կարող են լինել: Նույնախումբ երիտասարդների միությունը մեծ ու կրքոտ սեր կարող է թվալ, որը, սակայն, շատ կարճատև կարող է լինել: Չորրորդ խումբը խոստանում է ռոմանտիկ, հետաքրքիր ու ջերմ հարաբերություններ:

Արյան չորրորդ խումբ

Այս խմբի ներկայացուցիչները խելացի են, խոհեմ և իմաստուն, միևնույն ժամանակ փոքր-ինչ թույլ ու հակասական: Նա մարդ-հանելուկ է, ով երբեք ջանք չի գործադրի ավելի շատ գումար վաստակելու, բարձր դիրք գրավելու համար:
Այս խմբի ներկայացուցիչները շատ ընկերասեր են, կարողանում են լսել, հասկանալ, խորհուրդ տալ մարդկանց: Նրանք հազվադեպ են վիճում, քանի որ համոզված են, որ յուրաքանչյուրն իր ճշմարտությունն ունի:

Արյան չորորդ խումբ ունեցող տղամարդիկ

Այս տղամարդիկ օժտված են կանանց գերելու յուրօրինակ կարողությամբ: Նրանց կարգախոսն է՝ «Եկա, տեսա, հաղթեցի»: Այս տղամարդու մանրակրկիտ հյուսած թակարդը կարող է ընկնել յուրաքանչյուր խմբի կին: Բայց երբ այս տղամարդն ինքն է սիրահարվում, իրավիճակը միանգամայն փոխվում է: Նա պատրաստ է զոհաբերելու ամեն ինչ հանուն սիրո և նույնն էլ պահանջում է դիմացինից: Ընտրյալի յուրաքանչյուր անուշադիր քայլ կարող է գնահատվել որպես վիրավորանք: Այս տղամարդուն գերելու համար դուք պետք է հիշեք, որ ինչ էլ նա անի, հրաշալի է, առանց նրա դուք չեք կարող, նա ձեզ համար ամենակարևորն է: Ոչ մի դեպքում նրան պահանջներ մի՛ ներկայացրեք, մի՛ պարտադրեք ձեր ցանկությունները: Եթե ուզում եք սերտ հարաբերություններ հաստատել նրա հետ, մտերմացեք նրա ընկերների ու հարազատների հետ, բայց մի՛ շտապեցրեք նրան, համբերատար սպասեք իրադարձությունների զարգացմանը:
Առաջին խմբի կանայք այստեղ մեծ շանսեր չունեն, նրանց դատողությունները շատ կտրուկ ու կատեգորիկ են թվում այս տղամարդկանց: Արյան 4-րդ խմբի տղամարդիկ համարում են, որ այս կանանց կարելի է հարգել, հիանալ նրանցով, բայց ոչ սիրել: Բայց եթե կինը տարիքով մեծ է, կկարողանա գերել ու գրավել չորրորդ խմբի ռոմանտիկ տղամարդուն: Այս տղամարդիկ հաճախ համակրում են երկրորդ խմբի բարեհամբույր, համեստ ու հավասարակշռված գեղեցկուհիներին: Այս ռոմանտիկներին ուղղակի անհրաժեշտ է երկրորդ խմբի կանանց հանգստությունը, ջերմությունն ու համակարգվածությունը: Երրորդ խմբի կանանց կենսուրախությունը, անկեղծությունն ու հուզականությունը խոստանում են բուռն ու կրքոտ սիրավեպ՝ լի և՛ դրական, և՛ բացասական հույզերով: Նույնախումբ երկու անհատների միությունը գրեթե անհնար է: Նրանք չեն կարողանում լսել ու հասկանալ միմյանց, ընդհանուր հայտարարի գալ ու հանգստություն գտնել:

Արյան չորրորդ խումբ ունեցող կանայք

Այս կանայք ընկղմվում են սիրո հորձանուտում՝ մոռանալով սեփական առանձնահատկություններն ու հետաքրքրությունները: Նրա միակ նպատակը ընտրյալին երջանկացնելն ու նրա կյանքը հեքիաթի վերածելն է: Նա ամբողջությամբ պատրաստ է նվիրվելու իր ընտրյալին, որովհետև դրանից հաճույք է ստանում: Այս կնոջ կողքին յուրաքանչյուր տղամարդ պատրաստ է հերոս դառնալու: Սակայն հույզերի նման բուռն դրսևորումը յուրաքանչյուրի համար չէ: Շատ են նաև այն իրավիճակները, երբ շրջապատող տղամարդկանց մեծամասնությունը պատրաստ է հանուն նրա զոհաբերել ամեն ինչ, սակայն այս կինը խենթանում է այն միակի սիրուց, որն ուրիշին է սիրում:
Այս կանանց հեշտությամբ գայթակղում են առաջին խմբի առաջնորդ տղամարդիկ: Նրանց կարծիքով՝ նա հիացմունքի արժանի իդեալական տղամարդ է: Չնայած սեփական անլիարժեքության զգացողությունը իդեալի կողքին նույնպես կարող է ձանձրալի թվալ: Ներդաշնակ ու կայուն հարաբերություններ է խոստանում երկրորդ խմբի տղամարդու հետ միությունը: Այս կայուն ու իմաստուն տղամարդը կարող է նվիրվել չորրորդ խմբի կնոջը և փոխադարձաբար ստանալ մեծ սեր ու ջեմություն: Երրորդ խմբի տղամարդու անկայունությունն ու թեթևամտությունը կարող է հիասթափեցնել այս կնոջը, իսկ նրա հետ համատեղ կյանքը չի խոստանում կայունություն ու համակարգվածություն: Ամուսնությունը նույնախումբ տղամարդկանց հետ նույնպես անհոգ ու հանգիստ չի լինի:

Ամեն դեպքում, հիշե՛ք, որ դուք եք իրավիճակի տերը և դուք եք որոշում ձեր ճակատագիրը:

Նմանատիպ նյութեր

• ԽՈՅԵՐ. ընդհանուր բնութագիր
• ԱՌՅՈՒԾՆԵՐ. ընդհանուր բնութագիր
• ԿՈՒՅՍԵՐ. ընդհանուր բնութագիր
• Կնոջը կարելի է ճանաչել նաև ըստ սիրած շոկոլադի
• Ձեր երջանիկ արժեթուղթը. գուշակություն թվերով

Նոր նյութեր

Միացեք մեզ YouTube-ում... 80հզ.+ բաժանորդ